पेदोङमा सेर्पा दम्पतिको हत्या; हत्यारा चाँढै पक्रा पर्न सक्ने पुलिसले दियो सङ्केत

गफसफ.com, कालेबुङ 18 अगस्त।
पेदोङमा भएको सेर्पा दम्पतिको हत्यालाई लिएर पुलिसले जाँच अभियान तिब्र बनाएको छ भने चाँडै नै हत्यारा पक्रा पर्न सक्ने कालेबुङ जिल्ला पुलिस उप-अधिक्षक अतुल विश्वनाथनले बताएका छन्। उनले आज घट्ना स्थलको भ्रमण गरेर जानकारी लिएपछि घट्ना सम्बन्धमा पुलिसले महत्वपूर्ण सुईँको फेला पार्न सकेको दाबी गरेका छन्।

‘हामीले घट्नाको हरेक कोणबाट जाँच गरिरहेका छौँ। जाँकको क्रममा केही महत्वपूर्ण क्लुहरू हामीले फेला पारेका छौँ’ जिल्ला पुलिस उपअधिक्षक विश्वनाथनले भने। यसक्रममा उनले सोही महत्वपूर्ण सुरागकै आधारमा हत्यारा चाँढै पक्रा पर्न सक्ने सम्भावना रहेको पनि बताएका छन्।
 स्व. फुर्तेम्बा सेर्पा (पति) अनि स्व. कुसुम सेर्पा (पत्नी)
 स्व. फुर्तेम्बा सेर्पा (पति) अनि स्व. कुसुम सेर्पा (पत्नी) 

उनले हत्यालाई पक्राउ गर्नका निम्ति पुलिसले जाँच कार्य गरिरहेको भन्दै स्निफर डग टोलि समेत बोलाइएको जानकारी दिएका छन्। उनले सेर्पा दम्पतिको शवलाई सेफ्टी ट्याङ्कीमा फ्याँकेको अवस्थामा फेला पारेको पुष्टि गर्दै उनीहरू दुवैको निधारमा गहिलो चोटको निशानी रहेको पनि बताएका छन्। हत्याराले कुन अभिष्टको निम्ति हत्या गरेको हो भन्न नसकिने बताउँदै घरभित्र तोडफोड गरिएको अवस्था रहेको कारण परिवार पक्षले आफ्ना घरभित्रको सामाग्रीहरू हराएको छ छैन त्यसबारे जानकारी दिएपछि मात्रै चोरीको घट्ना सँग जोड्न सकिने बताएका छन्। यसक्रममा उनले उक्त घट्नालाई लिएर कालेबुङ थानामा प्राथमिकी दर्ता गरिएर जाँच सुरु भएको पनि स्पष्ट पारेका छन्। 

स्मरण रहोस्, कालेबुङ जिल्लाको पेदोङ स्थित दाक्योङ सेरिकल्चर नजिक सेर्पा दम्पतिको हत्याले सनसनी छाएको छ। पति फुर्तेम्बा सेर्पा (69) अनि पत्नी कुसुम सेर्पाको हत्यापछि उनीहरूको शवलाई सेफ्टी ट्याङ्कमा फ्याँकेको अवस्थामा पुलिसले शुक्रबार बेलुकी भेटेपछि उक्त घट्ना सार्वजनिक भएको हो। घट्नापछि पुलिसले शवको उद्घार गरेर आज कालेबुङ जिल्ला अस्पतालमा पोस्टमार्टम गरि परिवार पक्षलाई सुम्पिएको छ।

उक्त हत्या गत 16 अगस्तको राती नै भएको अनुमान गरिएको छ भने हत्याबारे शुक्रबार मात्र थाह लाग्न सकेको हो। पुलिस विभागमा नै कार्यरत छोरा सोङदेन सेर्पाले शुक्रबार दिउँसो घरमा आमा-बाबालाई फोन गर्दा फोन नउठाएपछि घट्नाबारे पत्तो लाग्न सकेको हो। छोरा सोङदेन सेर्पाले घरमा गरेको फोन नउठाएपछि आफ्ना छिमेकीहरूलाई आफ्नो घरमा गएर हेरिदिने खबर गरेपछि गाउँका आफन्तहरू घरमा गएर हेर्दा घर बन्द अवस्थामा अनि वरिपरिको दृष्य सन्दिघ रहेको थाह पाएपछि उनीहरूल तत्कालै पुलिसलाई सूचित गरेको थियो। घट्नाको जानकारी पाउन साथ घट्ना स्थलमा पुलिस पुगेर जाँच गर्न थालेपछि नै दुई दम्पतिको शवलाई सेफ्टी ट्याङ्कीमा हत्या पछि फ्याँकिदिएको अवस्थामा फेला पारेको हो।
‘मैले अघिल्लो दिन घरमा आमालाई फोन गरेर बात गरेको थिएँ। सधैँ झैँ भोलिपल्ट पनि मैले आमालाई फोन गरे तर फोन उठाएनन्। त्यसरीनै मैले बाबालाई पनि फोन गर्दा फोन उठाएनन्। उनीहरू दुवैले फोन नउठाएपछि मलाई चिन्ता लागेर भाइलाई पनि भने अनि गाउँका आफन्तहरूलाई घरमा गएर हेरिदिने भनेको थिए। आफन्तहरू आएर घरमा हेर्दा नै घट्नाबारे थाह पाउन सकिएको हो’ छोरा सोङदेन सेर्पाले बताएका छन्।

उनले आफन्तहरू घरमा आएर हेर्दा घर बाहिरबाट ताला लगाइदिएको अनि बाबाको फोन र टर्च आँगनमा लडिरहेको अनि आमाको फोन भने भित्र नै रहेको देखेपछि उनीहरूले नै पुलिसलाई सूचित गरेर बोलाउने कार्य गरेपछि मात्र घट्नाबारे पत्तो लाग्न सकेको पनि बताएका छन्।

Via गफसफ.com

Share this:

Post a Comment

 
Copyright © Indian Gorkhas. Designed by Darjeeling Web Solutions